ជប៉ុន៖ ភ្លើងគប់អូរឡាំពិកបានមកដល់ទីក្រុងតូក្យូហើយនៅថ្ងៃសុក្រ ទី០៩ ខែកក្កដានេះ ប៉ុន្តែស្ថិតក្នុងភាពសោះកក្រោះ និងស្ងប់ស្ងាត់យ៉ាងខ្លាំង ត្បិតពិធីដង្ហែភ្លើងគប់នេះពុំអនុញ្ញាតឱ្យមានអ្នកទស្សនា និងអបអរសាទរឡើយ ដោយមានត្រឹមការសម្តែងសិល្បះតិចតួចដើម្បីអបអរប៉ុណ្ណោះ ត្បិតជប៉ុនកំពុងព្រួយបារម្ភពីបញ្ហា កូវីដ-១៩។

ក្រោមបរិយាកាសរលឹមស្រិចៗនៅព្រឹកថ្ងៃសុក្រនេះ ដែលនៅសល់ត្រឹម ២សប្តាហ៍គត់មុនព្រឹត្តិការណ៍អូរឡាំពិកចាប់ផ្តើមនៅថ្ងៃទី២៣ ខែកក្កដា ខាងមុខនេះ ភ្លើងគប់ត្រូវបានយកមកលើវេទិកា និងបានប្រគល់ដល់ដៃអភិបាលក្រុងតូក្យូ លោកស្រី Yuriko Koike។

អ្នករៀបចំព្រឹត្តិការណ៍អូរឡាំពិក ២០២០ បានប្រកាសជាផ្លូវការនៅយប់ថ្ងៃព្រហស្បតិ៍ ម្សិលមិញនេះថា កិច្ចប្រជុំផ្លូវការពីគ្រប់ភាគីពាក់ព័ន្ធទាំងអស់បានសម្រេចហាមមិនឱ្យមានអ្នកគាំទ្រចូលទស្សនាការ​ប្រកួតឡើយ ក្រោយពីទីក្រុងតូក្យូទាំងមូលត្រូវបានដាក់ឱ្យស្ថិតក្រោមស្ថានភាពអាសន្នដោយការរាតត្បាតនៃវីរុសកូវីដ-១៩។

ពិធីប្រគល់គប់ភ្លើងអូរឡាំពិកនេះ គួរណាស់តែជាភាពរីករាយ និងរំភើបសម្រាប់ប្រជាជននៃប្រទេសម្ចាស់ផ្ទះ ប៉ុន្តែវាបែរជាសោះកក្រោះទៅវិញ ដោយពិធីនេះបានរៀបចំនៅដាច់ឆ្ងាយពីកន្លែងដែលមានមនុស្សកុះករ ក្នុងគោលបំនងកុំឱ្យមានការប្រមូលផ្តុំមនុស្សម្នា ដើម្បីចៀសវាងហានិភ័យពីការសាយភាយការចម្លងកូវីដ-១៩៕